ស្ថានភាពភូមិ
ការរៀបចំបង្កើតភូមិថ្មី ការបង្រួម និងការរំសាយភូមិត្រូវបង្កើតឡើងដោយប្រកាសក្រសួងមហាផ្ទៃ ។ នៅព្រះរាជាណាចក្រកម្ពុជាមានចំនួន ១៣៦៩៤ភូមិ តាមប្រកាសលេខ ៤៩៣ប្រក ចុះថ្ងៃទី៣០ ខែមេសាឆ្នាំ២០០១ ស្តីពីការកំណត់ចំនួនឈ្មោះ និងព្រំប្រទល់ឃុំ សង្កាត់ទូទាំងព្រះរាជាណាចក្រកម្ពុជា ។
ក្នុងការធានាដល់ការចាត់ចែងការងារនិងកិច្ចអភិវឌ្ឍន៍ឃុំ សង្កាត់ ក្រុមប្រឹក្សាឃុំ សង្កាត់ត្រូវរៀបចំគណៈកម្មការ ធ្វើការសិក្សាស្រាវជ្រាវ ហើយលើកសំណើសុំបង្កើតភូមិថ្មី ឬបំបែក ឬរំសាយ និងបង្រួមភូមិចំណុះឃុំ សង្កាត់របស់ខ្លួន ។
យោងតាមមាត្រា៣០ នៃច្បាប់គ្រប់គ្រងរដ្ឋបាលឃុំសង្កាត់ " រដ្ឋមន្ត្រីក្រសួងមហាផ្ទៃ ត្រូវចេញសេចក្តីណែនាំអំពីបែបបទនីតិវិធីនៃការជ្រើសរើសមេភូមិ ការចូលកាន់តំណែង ការផ្លាស់ប្តូរមេភូមិ និងការតែងតាំងជំនួយការភូមិ " ។ អាស្រ័យហេតុនេះក្រសួងមហាផ្ទៃបានចេញសេចក្តីណែនាំលេខ ០០៤សណន ចុះថៃ្ងទី ១៧ ខែមីនា ឆ្នាំ២០០៦ ស្តីពីបែបបទនីតិវិធីនៃការជ្រើសរើសមេភូមិ ការចូលកាន់តំណែង ការផ្លាស់ប្តូរមេភូមិ ការតែងតាំងជំនួយការមេភូមិ និងតួនាទីភារកិច្ច របៀបរបបធ្វីការរបស់ភូមិ ចែងថាៈ ក្នុងករណីក្រុមប្រឹក្សាឃុំ សង្កាត់បានសម្រេចឯកភាពលើសំណើសុំបងើ្កតភូមិថ្មី ឬបំបែក ឬរំសាយ និងបង្រួមភូមិបញ្ចូលគ្នាស្របតាមនីតិវិធី ហើយមេឃុំ ចៅសង្កាត់ត្រូវរៀបចំសំណើនោះទៅអភិបាលរាជធានី ខេត្តសាមី ។ ក្រោយពីបានទទួលសំណើនេះ ហើយពិនិត្យវាយតម្លៃស្របតាមលក្ខណៈវិនិច្ឆ័យហើយ អភិបាលរាជធានី ខេត្ត ត្រូវលើកសំណើនោះមកក្រសួងមហាផ្ទៃ ។
នៅព្រះរាជាណាចក្រកម្ពុជា ខេត្តចែកជាក្រុង និងស្រុក ។ ក្រុងចែកជាសង្កាត់ ហើយស្រុកចែកជាឃុំ សង្កាត់ ។
រាជធានីភ្នំពេញចែកចេញជាខណ្ឌ ។ ខណ្ឌចែកជាសង្កាត់ ។ដោយឡែកភូមិមិនមែនជាថ្នាក់រដ្ឋបាល ឡើយ ។
ឆ្នាំ២០០១ ព្រះរាជាណាចក្រកម្ពុជាមានចំនួន២៤ខេត្ត ក្រុង រួមមាន១៨៥ស្រុក ខណ្ឌ ១៦២១ឃុំ សង្កាត់ និងមានភូមិចំនួន ១៣៧០៧ភូមិ ។ ដោយសារមានស្ថានភាពប្រែប្រួលភូមិសាស្ត្រ សេដ្ឋកិច្ច និងស្ថានភាពប្រជាសាស្ត្រដែលតម្រូវឲ្យចំនួនភូមិមានការប្រែប្រួល ដូច្នេះនៅឆ្នាំ ២០០៨នេះភូមិមានចំនួន ១៣៨៥០ភូមិ ។ ម្យ៉ាងវិញទៀតនៅឆ្នាំ២០០៩នេះជាបរិបថ នៃការអនុវត្តច្បាប់ស្ដីពីការគ្រប់គ្រងរដ្ឋបាលរាជធានី ខេត្ត ក្រុង ស្រុក ខណ្ឌ និងច្បាប់ស្ដីពីការបោះឆ្នោតជ្រើសរើសក្រុមប្រឹក្សារាជធានី ក្រុមប្រឹក្សាខេត្ត ក្រុមប្រឹក្សាស្រុក ក្រុមប្រឹក្សាក្រុង ក្រុមប្រឹក្សាខណ្ឌ និងផ្អែកតាមគោលនយោបាយកំណែទម្រង់វិមជ្ឈការ និងវិសហមជ្ឈការ ស្របតាមផែនការយុទ្ធសាស្ត្រចតុកោណរបស់រាជរដ្ឋា ភិបាល ព្រះរាជាណាចក្រកម្ពុជាត្រូវបែងចែកជា ២៤រាជធានី ខេត្ត (១រាជធានី និង២៣ខេត្ត) ខណ្ឌ ចំនួន ៨ ស្រុកចំនួន ១៥៩ និងក្រុងចំនួន ២៦ ឃុំចំនួន ១៤១៧ និងសង្កាត់ចំនួន ២០៤។
ឆ្នាំ២០១០ មានការប្រែប្រួលព្រំប្រទល់រដ្ឋបាលមួយចំនួនរវាងខេត្តកណ្តាល និងរាជធានីភ្នំពេញ ដោយកាត់ឃុំចំនួន២០ ពីខេត្តកណ្តាល មកបញ្ចូលក្នុងរដ្ឋបាលរាជធានីភ្នំពេញ ដែលបណ្តាលឲ្យរាជធានីភ្នំពេញ មានសង្កាត់ចំនួន៩៦ និងភូមិចំនួន៨៩៧។