ព័ត៌មានលម្អិត
កម្មវិធីពានរង្វាន់ឃុំ សង្កាត់ខេត្តក្រចេះ
កាលពីថ្ងៃទី១៥ ខែកក្កដា ឆ្នាំ២០១០ នៅសាលមហោស្រពខេត្តក្រចេះមានរៀបចំសិក្ខាសាលាស្តីពីកម្មវិធីពានរង្វាន់ឃុំ សង្កាត់ និងសង្គមស៊ីវិលដើម្បីជ្រើសរើសរកបេក្ខជនក្រុមប្រឹក្សាឃុំ សង្កាត់ដែលទទួលបានពានរង្វាន់ឆ្នើម ពានរង្វាន់ពិសេស និងពានរង្វាន់លើកទឹកចិត្ត។ សមាសភាពចូលរួមក្នុងសិក្ខាសាលាមានដូចជាគណៈកម្មាធិការដឹកនាំកម្មវិធីពានរង្វាន់ថ្នាក់ខេត្ត និងគណៈកម្មាធិការបច្ចេកទេសថ្នាក់ខេត្ត ប្រតិភូគណៈកម្មាធិការដឹកនាំកម្មវិធីពានរង្វាន់ថ្នាក់ជាតិប្រធានមន្ទីរទាំងអស់ជុំវិញខេត្ត អភិបាលក្រុង ស្រុក តំណាងអង្គការសង្គមស៊ីវិលទាំងអស់ក្នុងខេត្ត ក្រុមប្រឹក្សា និងស្មៀនឃុំ សង្កាត់ទាំងអស់ក្នុងខេត្តក្រចេះ សរុបអ្នកចូលរួមទាំងអស់ចំនួន១៩៩ នាក់។
សិក្ខាសាលាមានកិត្តិយសចូលរួមអធិបតីភាពរបស់ឯកឧត្តម ខាំ ភឿន អភិបាលខេត្តក្រចេះ។ ឯកឧត្តម បានមានចំណាប់អារម្មណ៍ទាក់ទងនឹងកម្មវិធីពានរង្វាន់ឃុំ សង្កាត់ និងអង្គការសង្គមស៊ីវិលថា ខេត្តក្រចេះទទួលបាន ចំណាត់ថ្នាក់លេខ១ ក្នុងការដាក់ពាក្យរបស់ឃុំ សង្កាត់ ក្នុងចំណោមខេត្តដែលមានឃុំ សង្កាត់ក្រោម៥០។ ឯកឧត្តមក៏បានធ្វើការកោតសរសើរដល់អគ្គនាយកដ្ឋានរដ្ឋបាលមូលដ្ឋាន សម្ព័ន្ធភាពជាតិឃុំ សង្កាត់ និងគម្រោងគំាទ្រក្រុមប្រឹក្សាឃុំ សង្កាត់ដែលបានរៀបចំកម្មវិធីពានរង្វាន់នេះឡើង។
អង្គសិក្ខាសាលាបានស្តាប់បទបង្ហាញរបស់ក្រុមប្រឹក្សាឃុំ សង្កាត់ទាំង៣ ដែលបានជាប់ជ័យលាភីដើម្បីឲ្យគណៈកម្មាធិការដឹកនាំធ្វើការវាយតម្លៃកំណត់យកបេក្ខជនជ័យលាភីពានរង្វាន់ឆ្នើម ពានរង្វាន់ពិសេស និងពានរង្វាន់លើកទឹកចិត្ត។ អង្គសិក្ខាសាលាក៏បានផ្តល់ឳកាសឲ្យអ្នកចូលរួមទាំងអស់សួរដល់ឃុំដែលធ្វើបទបង្ហាញផងដែរ។ ជាលទ្ធផល ឃុំដែលទទួលបានចំណាត់ថ្នាក់លេខ១ ពានរង្វាន់ឆ្នើមគឺឃុំហាន់ជ័យ ទទួលបានប័ណ្ណសរសើរ១ និងទឹកប្រាក់៥០០ដុល្លារ ចំណាត់ថ្នាក់លេខ២ ពានរង្វាន់ពិសេសគឺឃុំសំបុក ទទួលបានប័ណ្ណសរសើរ១ និងទឹកប្រាក់៣០០ដុល្លារ និងចំណាត់ថ្នាក់លេខ៣ ពានរង្វាន់លើកទឹកចិត្តគឺឃុំជ្រោយបន្ទាយ ទទួលបានប័ណ្ណសរសើរ១ និងទឹកប្រាក់២០០ដុល្លារ៕