ព័ត៌មានលម្អិត
ការជំរុញការផ្លាស់ប្ដូរសមាជិកក្រុមប្រឹក្សាឃុំ សង្កាត់
ក្រុមប្រឹក្សាឃុំ សង្កាត់កើតឡើងដោយការបោះឆ្នោតដោយផ្ទាល់ពីប្រជាពលរដ្ឋក្នុងមូលដ្ឋានឃុំ សង្កាត់។ ក្រុមប្រឹក្សាឃុំ សង្កាត់មានអាណត្តិ៥ឆ្នាំ ហើយក្រុមប្រឹក្សានីមួយៗមានសមាជិកចាប់ពី ៥នាក់ ដល់១១នាក់។ សមាជិកក្រុមប្រឹក្សាឃុំ សង្កាត់ត្រូវបាត់បង់សមាជិកភាពរបស់ខ្លួនតាមករណីណាមួយដូចជា (១) សាមីខ្លួនទទួលមរណភាព (២) សាមីខ្លួនបាត់បង់កាយសម្បទា (៣) សាមីខ្លួនសុំលាលែងពីមុខតំណែងជាលាយល័ក្ខណ៍អក្សរ (៤) សាមីខ្លួនត្រូវតុលាការផ្ដន្ទាទោសដាក់ពន្ធនាគារពីបទមជ្ឈិម ឬឧក្រិដ្ឋណាមួយ (៥) សមាជិកក្រុមប្រឹក្សាឃុំ សង្កាត់ត្រូវបានបណ្ដេញចេញពីក្រុមប្រឹក្សាឃុំ សង្កាត់ដោយសារប្រព្រឹត្តផ្ទុយពីបទបញ្ជាផ្ទៃក្នុងនៃក្រុមប្រឹក្សាឃុំ សង្កាត់ (៦) ក្រុមប្រឹក្សាឃុំ សង្កាត់ត្រូវរំសាយ (៧) សាមីខ្លួនត្រូវបាត់បង់សមាជិកភាពពីគណបក្សនយោបាយ។
ក្រុមប្រឹក្សារាជធានី ក្រុមប្រឹក្សាខេត្ត ក្រុមប្រឹក្សាក្រុង ក្រុមប្រឹក្សាស្រុក និងក្រុមប្រឹក្សាខណ្ឌ ត្រូវកើតឡើងដោយការបោះឆ្នោតពីសមាជិកក្រុមប្រឹក្សាឃុំ សង្កាត់នៅក្នុងមុខតំណែងដែលជាការបោះឆ្នោតអសកល ហើយនឹងប្រព្រឹត្តទៅនៅថ្ងៃទី១៧ ខែឧសភា ឆ្នាំ២០០៩ នេះ។សម្រាប់ឆ្នាំ ២០០៩ នៅក្នុងគោលដៅនៃការត្រៀមលក្ខណៈក្នុងការចូលរួមការបោះឆ្នោតខាងមុខនេះ គណបក្សនយោបាយដែលមានអាសនៈនៅក្នុងក្រុមប្រឹក្សាឃុំ សង្កាត់ បានជំរុញការផ្លាស់ប្ដូរសមាជិកក្រុមប្រឹក្សាឃុំសង្កាត់យ៉ាងគំហុក។ ផ្អែកតាមការបោះឆ្នោតជ្រើសរើសក្រុមប្រឹក្សារាជធានី ក្រុមប្រឹក្សាខេត្ត ក្រុមប្រឹក្សាក្រុង ក្រុមប្រឹក្សាខណ្ឌ គណៈកម្មាធិការជាតិរៀបចំការបោះឆ្នោត "គ.ជ.ប" ត្រូវផ្តល់សុពលភាពបញ្ជីបោះឆ្នោតក្នុងរយៈពេលយ៉ាងតិច ៣៥ថ្ងៃ មុនថ្ងៃបោះឆ្នោត។ បញ្ជីនេះដែលបានផ្តល់សុពលភាពជាផ្លូវការហើយមិនអាចកែប្រែបានឡើយលើកលែងតែមានអ្នកបោះឆ្នោត ( សមាជិកក្រុមប្រឹក្សាឃុំ សង្កាត់)ណាមួយដែលមានឈ្មោះក្នុងបញ្ជីបោះឆ្នោតទទួលមរណភាព។ ក្នុងករណីនេះ ក្រសួងមហាផ្ទៃត្រូវបំពេញបែបបទក្នុងរយៈពេល០៧ថ្ងៃ មុនថ្ងៃបោះឆ្នោតដើម្បីឲ្យ គ.ជ.ប រៀបចំដាក់ជំនួសក្នុងបញ្ជីបោះឆ្នោត។
ដោយឡែកក្រសួងមហាផ្ទៃ ដែលមានអគ្គនាយកដ្ឋានរដ្ឋបាលមូលដ្ឋាន និងនាយកដ្ឋានរដ្ឋបាលមូលដ្ឋានជានាយកដ្ឋានជំនាញ បានខិតខំប្រឹងប្រែងយកចិត្តទុកដាក់ និងទទួលខុសត្រូវធ្វើការផ្លាស់ប្តូរសមាជិកក្រុមប្រឹក្សាឃុំ សង្កាត់ ចាប់ពីដើមខែមករា មកដល់ថ្ងៃទី១០ ខែមេសា ឆ្នាំ២០០៩នេះ ដែលមានក្រុមប្រឹក្សាបានផ្លាស់ប្ដូរចំនួន៥៩៥នាក់ រួមមានគណបក្សប្រជាជនកម្ពុជាចំនួន ១៩២នាក់ គណបក្សសម រង្ស៊ីចំនួន៣៤១នាក់ គណបក្សនរោត្តម រណឬទ្ធិចំនួន៤៧នាក់ គណបក្សហ្វ៊ុនស៊ិនប៉ិចចំនួន១៤នាក់ និងគណបក្សហង្ស ដារ៉ា ចលនាប្រជាធិបតេយ្យ ចំនួន០១នាក់។
ក្នុងការរៀបចំផ្លាស់ប្តូរសមាសភាពក្រុមប្រឹក្សាឃុំ សង្កាត់ទាំងនេះ តាមការសង្កេតរបស់នាយកដ្ឋានឃើញថា មានសំណុំឯកសារមួយចំនួននៅជាប់កកស្ទះ ឬរៀបចំបែបបទមិនបានត្រឹមត្រូវពីមូលដ្ឋានមកដោយសារ (១)ឃុំ សង្កាត់មួយចំនួននៅតាមខេត្តដាច់ស្រយាលជួបការលំបាកក្នុងការបញ្ជូនឯកសារផ្លាស់ប្តូរសមាជិកក្រុមប្រឹក្សាឃុំ សង្កាត់ឲ្យបានទាន់ពេលវេលា (២)សមាជិកក្រុមប្រឹក្សាឃុំ សង្កាត់ខ្លះត្រូវបានក្រសួងធ្វើការផ្លាស់ប្តូរ ឬទទួលស្គាល់ហើយពុំទាន់បានប្រកាសជាផ្លូវការផងស្រាប់តែសមាជិកនេះបានសុំលាឈប់ពីក្រុមប្រឹក្សាឃុំ សង្កាត់ ឬត្រូវបានបាត់បង់សមាជិកភាពពីគណបក្សនយោបាយ (៣)ឃុំ សង្កាត់ខ្លះទៀត មានសមាជិកក្រុមប្រឹក្សា និងបេក្ខជនបម្រុងនៃបញ្ជីបេក្ខជនឈរឈ្មោះបោះឆ្នោតនៃគណបក្សនយោបាយមួយចំនួនបានសុំលាលែង ឬត្រូវបានគណបក្សនយោបាយសាមីលុបឈ្មោះចេញពីសមាជិកគណបក្សនយោបាយ ហេតុនេះហើយគណបក្សនយោបាយទាំងនោះត្រូវរៀបចំបញ្ជីបេក្ខជនបម្រុងបន្ថែមថ្មីស្នើសុំសម្រេចជាផ្លូវការពីគ.ជ.ប នេះហើយគឺជាកត្តាមួយផងដែរធ្វើឲ្យការរៀបចំប្រកាសផ្លាស់ប្តូរក្រុមប្រឹក្សាឃុំ សង្កាត់មានភាពយឺតយ៉ាវ ដោយរង់ចាំការរៀបចំបង្កើតបញ្ជីបេក្ខជនបម្រុងថ្មី។
ដើម្បីឲ្យទាន់សភាពការក្នុងការបោះឆ្នោតជ្រើសរើសក្រុមប្រឹក្សារាជធានី ក្រុមប្រឹក្សាខេត្ត ក្រុមប្រឹក្សាក្រុង ក្រុមប្រឹក្សាស្រុក ក្រុមប្រឹក្សាខណ្ឌដែលនឹងប្រព្រឹត្តទៅនៅថ្ងៃទី១៧ ខែឧសភា ឆ្នាំ២០០៩ នេះ នាយកដ្ឋានរដ្ឋបាលមូលដ្ឋានបានផ្លាស់ប្តូរសមាជិកក្រុមប្រឹក្សាឃុំ សង្កាត់ដោយផ្អែកតាមច្បាប់ស្តីពីការគ្រប់គ្រងរដ្ឋបាលឃុំ សង្កាត់ និងសេចក្តីណែនាំលេខ ០១១ ស.ណ.ន ចុះថ្ងៃទី២០ ខែមិថុនា ឆ្នាំ២០០៨ ស្តីពីបែបបទ និងនីតិវិធីនៃការផ្លាស់ប្តូរសមាជិកក្រុមប្រឹក្សាឃុំ សង្កាត់ ដែលតម្រូវឲ្យសមាជិកក្រុមប្រឹក្សាឃុំ សង្កាត់ មេឃុំ ចៅសង្កាត់ អាជ្ញាធរដែនដី និងគណបក្សនយោបាយពាក់ព័ន្ធត្រូវអនុវត្តតាមសេចក្តីណែនាំនេះ។ ទោះបីមាននីតិវិធីនៃការផ្លាស់ប្តូរសមាជិកក្រុមប្រឹក្សាក៏ដោយ ក៏ក្រសួង ឬនាយកដ្ឋានរដ្ឋបាលមូលដ្ឋានបានចេញសេចក្តីជូនដំណឹងបន្ថែមទៀតដើម្បីជំរុញការផ្លាស់ប្តូរសមាជិកក្រុមប្រឹក្សាឃុំ សង្កាត់ឲ្យបានឆាប់រហ័សផងដែរ។ ក្នុងការជំរុញការផ្លាស់ប្តូរសមាជិកក្រុមប្រឹក្សាឃុំ សង្កាត់ លោកប្រធាននាយកដ្ឋានរដ្ឋបាលមូលដ្ឋានបានខិតខំប្រឹងប្រែង និងចាត់វិធានការគ្រប់មធ្យោបាយដើម្បីជួយអន្តរាគមន៍ទៅដល់រាជធានី ខេត្ត ក្រុង ស្រុក ខណ្ឌ ឲ្យរៀបចំឯកសារបញ្ជូនមកក្រសួងឲ្យបានទាន់ពេលវេលា និងបានសហការជាមួយ គ.ជ.ប គណបក្សនយោបាយ ធ្វើការផ្ទៀងផ្ទាត់ និងរៀបចំឯកសារឲ្យបានត្រឹមត្រូវដែលសមស្របតាមនីតិវិធីកំណត់ក្នុងគោលបំណងជៀសវាង ឬកាត់បន្ថយការកកស្ទះសំណុំឯកសារដើម្បីជំរុញការផ្លាស់ប្តូរសមាជិកក្រុមប្រឹក្សាឃុំ សង្កាត់ឲ្យបានតាមការកំណត់នៃកាលបរិច្ឆេទរបស់ គ.ជ.ប ។