សេចក្តីផ្តើម
Click here to download Khmer Unicode or Click here to visit Khmer Unicode Website
- រូបភាព ៖ ក្រសួងមហាផ្ទៃ
ក្រសួងមហាផ្ទៃស្ថិតនៅក្រោមចំណុះរាជរដ្ឋាភិបាលកម្ពុជាដែលត្រូវបានបង្កើតឡើងដោយច្បាប់ និងប្រកាសឲ្យប្រើដោយព្រះរាជក្រមលេខ នស/រកម/០១៩៦/០៨ ចុះថ្ងៃទី២៤ ខែមករា ឆ្នាំ១៩៩៦ ។
ក្រសួងមហាផ្ទៃជាស្ថាប័នរដ្ឋបាល " ស្ថាប័នរដ្ឋបាល : គឺជាប្រព័ន្ធអង្គការមួយដែលមានបេសកកម្ម មុខងារ ដឹកនាំ និងគ្រប់គ្រងផ្នែករដ្ឋបាល និងជំនាញតាមវិស័យនីមួយៗ តាមដែនដីស្ថិតក្នុងរង្វង់សមត្ថកិច្ចរបស់ខ្លួន" ។ ដូចនេះក្រសួងមហាផ្ទៃជាស្ថាប័នរដ្ឋបាលដែលមានសមត្ថកិច្ចដឹកនាំគ្រប់គ្រងរដ្ឋបាលដែនដីនៅតាមរាជធានី ខេត្ត ក្រុង ស្រុក ខណ្ឌ និង ឃុំ សង្កាត់ លើវិស័យរដ្ឋបាល ដឹកនាំគ្រប់គ្រងនគរបាលជាតិ ការពារសន្តិសុខសណ្តាប់ធ្នាប់សាធារណៈ និងការពារសុវត្ថិភាពជូនប្រជាពលរដ្ឋក្នុងព្រះរាជាណាចក្រកម្ពុជា ។
ក្រសួងមហាផ្ទៃត្រូវដឹកនាំដោយសហរដ្ឋមន្រ្តី ឬរដ្ឋមន្រ្តី ដែលអាចអមដោយរដ្ឋលេខាធិការ និង/ឬអនុរដ្ឋលេខាធិការតាមការចាំបាច់ ។
ក្នុងការគ្រប់គ្រង និងដឹកនាំសកម្មភាពរបស់ខ្លួន ក្រសួងមហាផ្ទៃត្រូវបានរៀបចំឡើងតាមរយៈអនុក្រឹត្យលេខ ១៦អនក្រ ចុះថ្ងៃទី២០ ខែធ្នូ ឆ្នាំ១៩៩៣ ស្ដីពីការរៀបចំ និងការប្រព្រឹត្តទៅនៃក្រសួងមហាផ្ទៃ ។ ក្នុងការដឹកនាំ គ្រប់គ្រង ក្រសួងមហាផ្ទៃមានអង្គភាពមួយចំនួនជាសេនាអធិការដែលធ្វើសកម្មភាពទាំងនៅថ្នាក់ជាតិ និងថ្នាក់ក្រោមជាតិ ។ ដោយឡែកក្រសួងមហាផ្ទៃដឹកនាំផ្នែករដ្ឋបាលស៊ីវិល និងនគរបាល ។ ក្នុងនោះដែរអគ្គនាយកដ្ឋានរដ្ឋបាល ក្រោយមកបានប្ដូរឈ្មោះទៅជា អគ្គនាយកដ្ឋានរដ្ឋបាលមូលដ្ឋាន។ ចំណែកឯ នាយកដ្ឋានរដ្ឋបាលមូលដ្ឋាន (DoLA) ត្រូវបានបង្កើតឡើងចំណុះឲ្យអគ្គនាយកដ្ឋានរដ្ឋបាលមូលដ្ឋាន (តាមអនុក្រឹត្យលេខ ៥៨អនក្រ ចុះថ្ងៃទី០៣ ខែកុម្ភៈ ឆ្នាំ២០០១) ។